Kuri uyu wa gatatu tariki ya 11 Ugushyingo 2020, Minisiteri y’Ubuzima yatangaje urupfu rw’umugabo w’imyaka 88 ubaye uwa 41 wishwe na COVID-19 mu Rwanda,umubare w’abamaze guhitanwa n’iki cyorezo ni 0.8%. Uyu mugabo abaye uwa 5 wishwe na COVID-19 ukomoka mu Karere ka Rwamagana mu minsi itatu gusa.
Uyu munsi kandi, habonetse abarwayi bashya 50 barimo 27 bapimwe muri Gereza ya Nyarugenge mu Mujyi wa Kigali, batandatu bo mu Karere ka Kirehe, 12 bapimwe mu bibasiwe kurusha abandi mu Karere ka Rubavu na batanu bo mu Karere ka Rwamagana.
Uyu munsi hakize abantu bashya 7 bituma abamaze gukira bagera ku 4,974 bangana na 94% by’abarwayi bose bamaze gutahurwa mu Rwanda kuva muri Werurwe.
Kugeza ubu abarwayi bamaze gutahurwaho COVID-19 mu Gihugu bageze ku 5,312. Abasigaye bakirimo kwitabwaho n’abaganga bageze kuri 297.
Uyu munsi hafashwe ibipimo 2,860, bituma umubare w’ibimaze gufatwa guhera muri Werurwe ubwo umurwayi wa mbere yatahurwaga mu Rwanda bigera ku 577,736.
Minisiteri y’Ubuzima iherutse gutangaza ko 90% by’abamaze guhitanwa na COVID-19 mu Rwanda bari basanganywe izindi ndwara zitandura (NCDs).
Inzego z’Ubuzima zirashimira abaturage ubwitange n’ubufatanye bakomeje kugaragaza mu rugamba rwo guhangana n’iki cyorezo, ariko zikabashishikariza kutirara kuko icyorezo kigihari ndetse bigaragara ko hari utundi duce ku Isi cyongeye kwibasira nyuma y’igihe gito ingamba zo kwirinda zisa n’izidohotse.
Kuri ubu mu Rwanda ingendo zirabujijwe guhera saa 10:00 z’ijoro kugeza saa 4:00 za mugitondo, n’amashuri akomeje gufungura hakurikijwe ibyiciro byayo nk’uko byemejwe na Guverinoma.
Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.
Muri Afurika abamaze kwandura COVID-19 bageze kuri miriyoni n’ibihumbi 904.8 barimo abantu miriyoni n’ibihumbi 607.1 bakize, n’abandi basaga ibihumbi 45.9 bahitanywe na cyo. Abamaze kwandura ku Isi barasaga miriyoni 52.3 barimo abasaga miriyoni 36.6 bakize n’abapfuye barenga miriyoni imwe n’ibihumbi 287.
NIYONZIMA Theogene
